Heimilisofbeldi er ofbeldi sem er beitt af einhverjum sem er skyldur eða tengdur þér, til dæmis af maka, fyrrverandi maka, fullorðnu barni, foreldri, systkini eða forsjáraðila.
Ofbeldið getur átt sér stað utan heimilisins og gerandi og þolandi þurfa ekki að búa saman eða vera giftir. Stundum er þetta líka kallað ofbeldi í nánu sambandi.
Ofbeldið getur verið af mörgum toga, til dæmis andlegt, líkamlegt, kynferðislegt, fjárhagslegt, stafrænt eða heiðursofbeldi. Algengt er að nauðungarstjórnun sé beitt. Heimilisofbeldi er ólöglegt og litið alvarlegum augum í réttarkerfinu.
Réttarkerfi er samheiti yfir lögreglu, ákæruvald (ríkissaksóknari, héraðssaksóknari og lögreglustjórar) og dómstóla. Þegar mál er tilkynnt til lögreglu fer fram rannsókn, síðan metur ákæruvaldið hvort það verði ákært og sent til dómstóla.
Það er algengt að lögreglan sé kölluð á vettvang vegna heimilisofbeldis en það er líka hægt að tilkynna það hvenær sem er til lögreglu.
Ef lögreglan metur að brot hafi átt sér stað hefst rannsókn samkvæmt verklagsreglum um heimilisofbeldi. Málið fer þá í gegnum ákveðið ferli innan réttarkerfisins. Ef ekki eru næg gögn til að taka málið áfram getur tilkynning samt styrkt það síðar.
Ferlið getur verið krefjandi og tekið tíma. Það er samt eina leiðin til að láta gerandann svara til saka. Þessi leiðarvísir reynir að útskýra skref fyrir skref hvernig ferlið gengur fyrir sig fyrir einstaklinga 18 ára og eldri.
