Þegar ákærusvið hefur gefið út ákæru á hendur geranda er málið flutt fyrir héraðsdómi. Þá mætir þú í dómsal og segir frá þinni upplifun.
Málið er venjulega flutt í héraðsdómi þar sem gerandinn er með lögheimili. Þú gætir því þurft að fara þangað til að bera vitni. Kostnaður við ferðalög, til dæmis flugfargjöld, er yfirleitt settur inn í sakarkostnað sem dómari úrskurðar um.
Þingfesting þýðir upphaf reksturs málsins fyrir héraðsdómi. Dómari ákveður stað og stund þar sem málið verður þingfest.
Hinn ákærði, gerandinn, þarf þá að mæta og játa sök eða neita.
Þú þarft ekki að mæta í þingfestinguna. Réttargæslumaðurinn þinn er viðstaddur fyrir þína hönd. Hann lætur þig vita hvort sakborningurinn hafi játað eða neitað sök og hvenær aðalmeðferð mun fara fram.
Við þingfestinguna fær dómsmálið númer. Númerið getur þú notað til að fylgjast með málinu á vef héraðsdóms.
Ef gerandi játar ákveður dómari refsingu, yfirleitt innan fjögurra vikna frá þingfestingunni. Þá þarft þú ekki að bera vitni fyrir dómi.
Ef gerandi neitar sök fer fram aðalmeðferð í málinu. Aðalmeðferð er það sem kallað er réttarhöld í daglegu tali. Í aðdraganda aðalmeðferðar má verjandi sakborningsins leggja fram skriflega greinargerð þar sem hann lýsir því hvaða vörnum hann byggir á í málinu.
Málið er flutt af héraðssaksóknara annars vegar og verjanda gerandans hins vegar. Meðal annars eru kölluð til vitni sem tengjast málinu. Allir eldri en 15 ára eru skyldugir til að koma fyrir dóm sem vitni og svara spurningum ef þeir fá boð. Eitt af mikilvægustu vitnunum ert þú, þolandinn í málinu.
Réttargæslumaðurinn þinn er viðstaddur alla aðalmeðferðina fyrir þína hönd og ef hann hefur lagt fram bótakröfu í málinu gerir hann grein fyrir henni fyrir dómara.
Brotaþolar, rétt eins og önnur vitni, eru boðaðir á ákveðnum tíma. Réttargæslumaðurinn þinn lætur þig vita hvenær þú átt að mæta og er þér til stuðnings í ferlinu.
Sá sem ber vitni fyrir dómi má ekki hlusta á framburð þeirra sem gefa sinn vitnisburð á undan. Oftast berð þú vitni á eftir gerandanum. Þú bíður þess vegna fyrir utan dómsalinn þar til þér er vísað inn. Stundum getur vitnisburður dregist og þá gætir þú þurft að bíða lengur en þú hélst. Þú mátt svo fylgjast með réttarhöldunum eftir að þú hefur borið vitni, ef þú vilt.
Vanalega eru réttarhöld varðandi ofbeldi í nánu sambandi lokuð til að vernda hagsmuni þína og aðra sem málið varða.
Ef þú vilt að réttarhöldin séu opin geturðu beðið um það og þá er vanalega farið eftir þínum vilja.
Þar inni eru dómari, saksóknari, verjandi gerandans, réttargæslumaðurinn þinn og svo gæti gerandinn verið viðstaddur líka. Gerandi hefur rétt á því að vera inni í salnum en oft víkja þeir sér frá eða kjósa að vera ekki viðstaddir. Þegar komið er að þér sest þú í vitnastúku.
Yfirleitt eru dómsalir lítil herbergi og því er nálægð milli fólks stundum meiri en búast mætti við fyrir fram. Gerandinn gæti því setið nokkrum metrum frá þér.
Vinstra megin í dómsalnum sitja saksóknari og réttargæslumaðurinn þinn. Hægra megin sitja gerandi og verjandi hans. Dómarinn er svo í miðjunni. Gott ráð er að horfa bara á dómarann og tala til hans, eða í þá átt sem héraðssaksóknari og réttargæslumaðurinn sitja til að fá styrk.
Mögulegt er að óska eftir því að sakborningurinn verði ekki viðstaddur í dómsalnum á meðan þú berð vitni. Það er réttargæslumaðurinn þinn sem setur fram þá beiðni. Stundum samþykkir gerandi að víkja en ef ekki þarf dómarinn að úrskurða um hvort hann eigi að víkja eða ekki.
Fyrst biður dómari þig um að segja hvað þú heitir og útskýrir í stuttu máli hvernig þetta muni ganga fyrir sig. Dómari greinir þér frá því að það sé skylda að segja satt og rétt frá og að refsivert sé að segja rangt frá fyrir dómi. Þetta þýðir ekki að dómari búist við því að þú segir ósatt, heldur ber honum skylda til að leiðbeina brotaþola um þetta. Dómarinn segir það sama við öll vitnin.
Ef gerandinn er tengdur þér nánum fjölskylduböndum kynnir dómarinn þér að þér beri ekki skylda til að gefa skýrslu.
Yfirleitt er brotaþoli fyrst beðinn um að segja frá þeim atvikum sem eru til umfjöllunar og síðan spyr saksóknari út í einstök atriði. Eftir að sækjandi hefur spurt spurninga býðst verjanda að spyrja og stundum spyrja líka réttargæslumaður og dómari.
Markmiðið með því að hlusta á þína frásögn er að varpa ljósi á atvik málsins.
Þú ert að rifja upp þung atriði undir erfiðum kringumstæðum. Það er því allt í lagi, og reyndar mikilvægt, að láta vita ef þú manst ekki eða ert óviss um einhver málsatvik. Stundum rifja dómari, sækjandi eða verjandi upp hvað þú sagðir í skýrslutöku hjá lögreglu og spyrja hvort sú lýsing hafi verið rétt.
Eftir að þú hefur borið vitni mátt þú vera áfram og fylgjast með framhaldi málsins, biðja um að fá að fylgjast með gegnum fjarfundarbúnað annars staðar í dómhúsinu eða yfirgefa dómsalinn.
Gott ráð er að horfa bara á dómarann og tala til hans, eða í þá átt sem héraðssaksóknari og réttargæslumaðurinn þinn sitja.
Það tekur um 6 mánuði að fara yfir málið hjá héraðssaksóknara áður en ákvörðun er tekin um ákæru eða niðurfellingu.
Ef ákært er í málinu þarf að taka málið fyrir í þingfestingu, aðalmeðferð og dómsuppkvaðningu. Á milli þingfestingar og aðalmeðferðar líða allt frá 1 mánuði og upp í 6. Það fer eftir skilum á greinargerðum, álagi hjá dómaranum sem fær úthlutað þínu máli og fleiru.
Dóm á svo að kveða upp innan fjögurra vikna frá aðalmeðferðinni.
Á vef héraðsdóms (undir „Dagskrá“ hjá hverjum héraðsdómstól) er hægt að sjá mál sem bíða þess að vera tekin fyrir og hvort um er að ræða þingfestingu, aðalmeðferð eða dómsuppkvaðningu. Á vefnum er líka hægt að skoða dóma sem hafa verið felldir á hverju landsvæði fyrir sig.