Réttargæslumaður

Réttargæslumaður

Réttargæslumaður er lögmaður sem passar upp á þína hagsmuni í kæruferlinu. Þolendur kynferðis- og heimilisofbeldis í réttarvörslukerfinu eiga almennt rétt á að fá réttargæslumann.

Þess vegna þarft þú ekki að ráða lögmann ef þú kærir kynferðisbrot eða ert brotaþoli í kærumáli vegna ofbeldis í nánu sambandi. Laun réttargæslumannsins eru greidd af ríkinu fyrir ákveðinn tímafjölda þannig að mikilvægt er að nýta tímann með honum sem best varðandi málið í réttarvörslukerfinu.

Réttargæslumenn eru:

• Lögmenn
• Út um allt land
• Konur og karlar á öllum aldri
• Mörg með mikla reynslu í málum eins og þínu

Hvað gerir réttargæslumaður?

Er með þér í skýrslutöku

Réttargæslumaðurinn hjálpar þér að undirbúa þig fyrir skýrslutöku hjá lögreglu. Þau fara líka með í skýrslutökuna og eru með þér allan tímann.

Í héraðsdómi

Ef málið þitt fer fyrir dóm undirbýr réttargæslumaðurinn þig fyrir að bera vitni í héraðsdómi. Réttargæslumenn eru viðstaddir öll réttarhöldin fyrir þína hönd.

Veitir upplýsingar um málið

Réttargæslumaður útskýrir málsmeðferðina fyrir þér. Hann eða hún getur aflað upplýsinga um stöðu málsins hjá lögreglu og héraðssaksóknara.

Bætur

Réttargæslumaður sækir um skaðabætur fyrir þína hönd.

• Sótt um bætur í kynferðisbrotamálum.
• Sótt um bætur í heimilisofbeldismálum.

Góð ráð

Réttargæslumaðurinn þinn getur gefið þér lagalegar leiðbeiningar og ráð.

Hvernig fæ ég réttargæslumann?

Þú getur:

• valið réttargæslumann af lista hjá lögreglu eða þolendamiðstöð
• fengið réttargæslumann á bráðamóttökunni
• leitað til lögmanns sem þú vilt að taki verkið að sér

Og mjög mikilvægt:

Þú mátt alltaf skipta um réttargæslumann.

Þarf ég að fá réttargæslumann?

Þú átt rétt á að fá réttargæslumann en það er ekki skylda.

Ef þú ert yngri en 18 ára er réttargæslumaður alltaf tilnefndur.