Líkamlegt ofbeldi er mjög alvarlegt
Þegar einhver meiðir þig, eða hótar að meiða þig, kallast það líkamlegt ofbeldi. Það skiptir ekki máli hvort það verði líkamlegur skaði. Það kallast líka líkamlegt ofbeldi að neita að gefa einhverjum eitthvað fyrir líkamann, eins og lyf. Það er aldrei í lagi að beita líkamlegu ofbeldi. Oft hefur andlegu ofbeldi verið beitt í einhvern tíma áður en líkamlega ofbeldið byrjar.
Afleiðingar geta verið misjafnlega alvarlegar. Því alvarlegra sem ofbeldið er, þeim mun meiri áhrif hefur það á líkamlega og andlega heilsu. Eftir því sem það stendur lengur yfir því meiri áhrif hefur það á heilsuna. Áhrif ofbeldis vara í langan tíma eftir að það hættir. Alvarlegasta afleiðing líkamlegs ofbeldis í nánu sambandi er þegar annar aðilinn myrðir maka sinn.
Að þurfa að vera vitni að ofbeldi er líka ofbeldi. Börn sem verða vitni að ofbeldi á heimilinu líður svipað illa og ef þau eru sjálf beitt ofbeldi.
Ofbeldishringurinn
Ofbeldi í nánu sambandi fylgir oft mynstri sem er kallað ofbeldishringurinn.
- Spenna safnast upp.
- Á einhverjum tímapunkti losnar um spennuna í formi líkamlegrar eða andlegrar árásar.
- „Hveitibrauðsdagarnir” þar sem gerandinn er fullur eftirsjár.
Síðan heldur þessi vítahringur sífellt áfram.
Það er líkamlegt ofbeldi þegar viðkomandi hefur:
- Hótað að skaða þig eða aðra á heimilinu.
- Hótað að skaða sjálfan sig.
- Ógnað þér með svipbrigðum eða hnefa.
- Ógnað þér með hnífi eða einhverjum hlut sem hægt er að nota sem vopn.
- Sagst vilja drepa þig eða sýnt það með hegðun (eins og með hálstaki).
- Gripið í þig til að hindra að þú farir.
- Viljandi eyðilagt hluti sem þú átt.
- Meitt þig á einhvern hátt.
- Þrýst á þig að taka inn lyf.
- Bannað þér að taka nauðsynleg lyf.
Fáðu hjálp
Það er alltaf betra að segja einhverjum frá hvernig þér líður.
- Ef ofbeldið er nýlega yfirstaðið getur þú farið á bráðamóttöku sjúkrahúsa, þar starfar sérstakt teymi sem sérhæfir sig í ráðgjöf og stuðningi vegna ofbeldis í nánu sambandi.
- Þú getur haft samband við miðstöðvar fyrir þolendur ofbeldis sem sérhæfa sig í stuðningi við ofbeldi (18 ára og eldri). Ráðgjöfin er ókeypis og engu máli skiptir hversu langt er síðan ofbeldið átti sér stað.
- Börn og fullorðnir geta alltaf talað við einhvern hjá 1717 (hjálparsíma Rauða krossins) eða haft samband við 112 gegnum síma eða netspjall.
Ef þú býrð við ofbeldi er gott að gera öryggisáætlun til að vernda öryggi þitt og barna.
