Sexan stuttmyndakeppni

Stuttmyndasamkeppnin Sexan 2025 er á næsta leyti!

Opnað verður fyrir innsendingar 3. febrúar 2025 og verður opið til og með 8. apríl 2025.

Sexan stuttmyndakeppni er haldin árlega fyrir öll í 7. bekk grunnskólum landsins. Öll á aldrinum 12-13 ára geta tekið þátt.

Fyrirkomulag Sexunnar er einfalt. Þátttakendur fá fræðslu í skólum og/eða félagsmiðstöðvum og fá tækifæri til að búa til og skila inn tilbúinni stuttmynd, hámark 3 mínútur að lengd. Viðfangsefni keppninnar eru fjórar birtingarmyndir stafræns ofbeldis:

• samþykki
• nektarmynd
• tæling
• slagsmál ungmenna

Auk þess er opinn flokkur fyrir allt það sem þér finnst mikilvægt að allir krakkar í 7. bekk viti um.

Þú getur sent inn mynd hér eða beðið kennarann þinn eða starfsfólk félagsmiðstöðvarinnar að gera það. Innsendingargáttin er eins og áður segir opin frá 3.febrúar 2024 til og með 8.apríl 2025.

Þátttakendur hafa frjálsar hendur með handritagerð, framkvæmd og eftirvinnslu. Hver skóli má senda að hámarki 3 myndir í keppnina en dómnefnd skipuð fulltrúum ungmennaráðs, RÚV, MMS og kvikmyndagerðar velur svo þrjár bestu stuttmyndirnar sem verða sýndar bæði í bíóhúsum, á vef UngRÚV og dreift í alla grunnskóla landsins sem fræðsluefni.

Vinningsmyndirnar verða sýndar í Bíóparadís á Barnamenningarhátíð og á vef KrakkaRÚV. Auk þess verða vinningsmyndirnar sendar í alla skóla á landinu og notaðar í fræðsluskyni fyrir öll í 7. bekk. Hér fyrir neðan getur þú fundið allt sem þú þarft að vita um kvikmyndagerð og stafrænt ofbeldi, auk kennslupakka fyrir kennara og leiðbeinendur.

• Best er að hafa myndina í "landscape" formatti (16:9) og að myndgæðin séu í 1920x1080px eða hærri.
• Settu lógó SEXUNNAR í lok myndarinnar (sem endaskilti). Hægt er að sækja það hér neðar á síðunni.
• Mundu að skráin sem þú skilar þarf að sýna heiti stuttmyndar og nafn skólans þíns.

Við hvetjum sérstaklega ungmenni af erlendum uppruna, hinsegin ungmenni og fötluð ungmenni að taka þátt!

Hvernig veit ég hvað viðfangsefnin þýða?

Hér fyrir neðan er skýr og einföld útskýring á hvað tæling, nektarmynd, samþykki og slagsmál ungmenna er.

Mundu að góð stuttmynd sýnir hvað krakkar geti gert til að hjálpa þeim sem verða fyrir stafrænu ofbeldi.

Hér má sjá vinningsmyndir frá fyrri keppnum

Sigurvegarar Sexunnar 2024

1. sæti Smáraskóli
2. sæti Smáraskóli
3. sæti Hólabrekkuskóli

Hvatningarverðlaun Sexunnar 2024 - Smáraskóli

Verðlaun veitt fyrir eftirtektarverða frásögn eða aðra hugmyndaauðgi við gerð stuttmyndar.

Sigurvegarar Sexunnar 2023

1. sæti - Selásskóli
2. sæti - Heiðarskóli Reykjanesbæ
3. Suðurhlíðarskóli

Um Sexuna

Keppnin var fyrst haldin í ársbyrjun 2023 og var mikil þátttaka frá nemendum hvaðanæva af á landsbyggðinni. Markmiðið er að að ungt fólk fræði ungt fólk um birtingarmyndir stafræns ofbeldis. Samkvæmt niðurstöðum rannsóknar Fjölmiðlanefndar um nektarmyndir á meðal grunnskólabarna kemur fram að 51% stúlkna og 22% stráka hafa verið beðin um nektarmynd.

Að Sexunni stendur breið fylking samstarfsaðila sem öll láta sig varða lýðheilsu ungmenna: Neyðarlínan, Reykjavíkurborg, Samband íslenskra sveitarfélaga, Jafnréttisstofa, Barna- og fjölskyldustofa, Fjölmiðlanefnd, Samskiptafulltrúi æskulýðsstarfs, Ríkislögreglustjóri, Miðstöð menntunar og skólaþjónustu og RÚV.

Hér fyrir neðan má skoða sigurmyndirnar frá 2023, frá Selásskóla í Árbæ, Heiðarskóla í Reykjanesbæ og Suðurhlíðarskóla í Reykjavík.