Hvernig er rannsóknin?
Lögreglan á að reyna að komast að því sem er satt. Í rannsókn safnar lögreglan saman alls konar sönnunargögnum. Lögreglan þarf að hafa gögnin til að það sé hægt að fara með málið fyrir dóm.
Staðsetning brots
Lögreglan á því svæði (líka kallað umdæmi) þar sem brotið átti sér stað rannsakar málið. Ef engin sérstök rannsóknardeild kynferðisbrota er í umdæminu fær lögreglan stuðning frá öðrum umdæmum.
Brotið flokkað
Fyrst er brotið flokkað. Það þýðir að það er fært undir ákveðin ákvæði í lögum. Dæmi um brotaflokka eru: nauðgun, áreitni og blygðunarsemisbrot.
Þín lýsing ræður brotaflokknum
Flokkunin byggir á lýsingunni þinni á brotinu í skýrslutökunni. Lögreglan reynir að láta lýsinguna passa við rétt ákvæði laganna. Það gæti komið á óvart hvernig brotið er flokkað. Það getur verið ólíkt hvernig við tölum um brot í daglegu tali og hvernig lögin skilgreina brot.
Söfnun gagna
Lögreglan gerir meðal annars þetta:
- Boðar gerandann í skýrslutöku.
- Boðar vitni í skýrslutöku.
- Ber það sem þú segir saman við það sem gerandinn og vitni segja.
Sönnunargögn eru til dæmis:
- Upptökur úr eftirlitsmyndavélum.
- Símagögn eða símar.
- Samskipti á samfélagsmiðlum.
- Vottorð frá læknum, sálfræðingum og slíkum fagaðilum.
Aftur í skýrslutöku
Lögreglan gæti kallað þig inn í aðra skýrslutöku til að varpa ljósi á eitthvað sem komið hefur upp í rannsókninni eða beðið þig um frekari gögn. Þá hefur lögreglan samband við þinn réttargæslumann.
Mikilvæg gögn um gerandann
Ef þú getur sagt um leið hver gerandi er reynir lögreglan að ná honum strax eftir brotið. Þannig er möguleiki á að ná í mikilvæg gögn. Ef brotið er gamalt er metið í hvert sinn hvaða gagna er hægt að afla, til dæmis af vettvangi brotsins eða heimili geranda.
Ef gerandi er búsettur erlendis
Það er ýmislegt hægt að gera í rannsókn kynferðisbrotamáls þó að gerandi sé einungis tímabundið á landinu, til dæmis ef hann er ferðamaður.
Þú ættir ekki að láta stutta dvöl geranda stöðva þig í að kæra. Eins og með öll önnur kynferðisbrotamál er best að fá lögregluna sem fyrst inn í málið svo að hægt sé að hafa uppi á gerandanum. Ef hann er farinn úr landi er oft samstarf á milli íslensku lögreglunnar og lögreglu í heimalandi hans um að hafa uppi á honum.