Skýrslutaka á lögreglustöð

Undirbúningur

Réttargæslumaðurinn þinn undirbýr þig fyrir skýrslutökuna og á hverju þú mátt eiga von. Það er líka mælt með því að hafa réttargæslumanninn með í skýrslutökunni sjálfri. Ef þú átt eftir að finna réttargæslumann geturðu fengið lista yfir lögmenn hjá lögreglu, beðið um að þér sé úthlutað réttargæslumanni eða leitað til lögmanns sem þú vilt að taki verkið að sér.

Staðsetning

Skýrslutakan fer fram í viðtalsherbergi á lögreglustöð.

Meira um skýrslutökuna

• Viðtalið er tekið upp, bæði í hljóði og mynd.
• Í herberginu eru þú, rannsakandi hjá lögreglunni og réttargæslumaðurinn þinn. Ef þú þarft túlk er hann líka viðstaddur.
• Ef þú áttar þig seinna á að ekki hafi allt komið fram í skýrslutökunni geturðu haft samband við rannsakanda eða réttargæslumanninn þinn og beðið um að bæta við upplýsingum við skýrsluna. Rannsakandi gæti þá kallað þig aftur inn til skýrslutöku svo að viðbótarupplýsingarnar séu til á upptöku.

Gott að vita

• Það getur hjálpað að hafa sagt upphátt frá atburðinum áður en þú mætir í skýrslutökuna. Þetta getur hjálpað þér við að segja skýrt frá og auðveldað ferlið. Þú getur gert þetta upp á þitt eindæmi, með einhverjum sem þú treystir eða með réttargæslumanni.
• Þú mátt hafa með þér punkta, glósubók til að skrifa í eða tilbúinn texta.
• Þú mátt biðja um annan rannsakanda til að taka skýrslu ef þú treystir þér ekki til að ræða málið við þann rannsakanda sem tekur á móti þér.
• Ekki fela áfengisneyslu eða notkun vímuefna. Það hefur ekki áhrif á stöðu þína en getur aðstoðað við rannsókn málsins.
• Eftir skýrslutöku máttu búast við að vera úrvinda svo það er ekki ráðlagt að fara aftur til vinnu eða að sinna erindum í beinu framhaldi.
• Það er best að gefa sem skýrasta lýsingu á brotinu og ekki hika við að nota rétt orð yfir hlutina, til dæmis yfir líkamshluta. Rannsakendur eru mjög vanir því að heyra allt sem viðkemur heimilisofbeldi.
• Skýrslutakan tekur yfirleitt um klukkutíma. Stundum tekur hún lengri tíma svo gott er að gera ráð fyrir því.

Óvænt atriði

Sumt gæti komið þér á óvart í skýrslutökunni. Til dæmis:

• Skýrslutakan getur virkað kuldaleg. Ástæðan er að þau sem rannsaka málið verða að vera hlutlaus. Þeirra markmið er samt sem áður að fá sem mestar upplýsingar um hvað gerðist þannig að reyndu eftir fremsta megni að láta það ekki trufla þig of mikið.
• Rannsakandinn sem tekur viðtalið er ekki í lögreglubúningi heldur í sínum eigin fötum.

Eftir skýrslutöku

Aftur í skýrslutöku

Á meðan á rannsókn stendur gæti lögregla kallað þig inn í aðra skýrslutöku til að varpa ljósi á eitthvað sem komið hefur upp í rannsókninni eða biðja þig um einhver gögn. Þá hefur lögreglan samband við þinn réttargæslumann sem aðstoðar þig að svara.

Nokkurra mánaða bið

Nú rannsakar lögreglan málið. Rannsókn lögreglu getur tekið nokkra mánuði. Það er lítið sem þú getur gert annað en að huga vel að öryggi þínu og uppbyggingu eftir áfallið. Það hefur reynst mörgum þolendum vel að skilja í sundur bataferlið annars vegar og gang málsins í réttarvörslukerfinu hins vegar.